政情：老婆被改姓 劉怡翔大懵
新上任嘅財經事務及庫務局副局長劉怡翔（James）早前公布佢嘅利益申報文件，並上載至局方網頁。不過，我哋一打開就發現James太太，即係拔萃女書院校長靳麗娟竟然改咗名做勒麗娟。點解劉太會無端端改咗姓嘅？莫非James寫錯老婆個名？
內部出錯 冇睇照簽名
財經事務及庫務局回應話，呢個其實係手誤，事關James提交嘅手寫版本並冇錯，不過職員處理文件時就打錯咗，佢哋知道錯誤後，已即時作出更正。話時話，點解James會喺份有錯字嘅利益登記文件上，照樣簽名作實呢？消息就話，可能James集中查清楚啲利益詳情，而忽略咗太太個名。作為問責官員，凡事都係細心啲好。
講番申報內容，James好鍾意置業，除咗同太太有個南區嘅住宅，仲同妻女聯名持有兩個油尖旺區單位。此外，新任發展局副局長馬紹祥都喺上月申報，佢同太太共同擁有一個九龍城單位，以及一個喺澳洲墨爾本嘅單位。