中環出更：修哥勸契女「哪吒」唔好捱壞
西貢區區議員「哪吒」方國珊一向惹火，雖然前年立法會選舉落敗，喺區議會又被泛民、建制聯手狙擊，但反而激起「哪吒」嘅無畏戰鬥格。好似佢一手創立嘅地區政團「專業動力」就愈做愈大，前晚就請各界好友食開年飯。去支持嘅又點少得佢契爺胡楓（修哥）呢？修哥話，契女又勤力又搏命，但希望佢搏還搏，最緊要注意健康，千祈唔好捱壞身子。
方國珊每年都會搞新春晚宴，前晚就喺九龍城擺咗八圍，出席人士包括前鄉議局主席張人龍夫人、世界綠色組織行政總裁余遠騁等，仲有粵劇界名伶吳君麗同楊麗紅。話晒做過哪吒，方國珊人面廣唔使多講。
契爺飯局獻唱娛賓
近期人氣急升嘅「小生」胡楓當晚搶咗方國珊唔少鏡，唔少人爭住同佢合照。修哥亦好識做，即場唱咗兩首歌娛賓，一班酒樓侍應聽得入晒神，唔少人都放低手頭工作欣賞修哥獻唱。
雖然契爺勸唔好太搏，不過方國珊就話，一日見到將軍澳堆填區存在，一日見到班立法會議員偷懶，差啲被政府偷雞通過擴建將軍澳堆填區，佢就要繼續奮鬥。佢話明年區選在即，新年願望係「專業動力」能夠培育更多新人服務地區，如果有十個八個出選就最理想喇。
方國珊又話，雖然「專業動力」無政黨撐腰，確係少咗好多資源，但係做嘢就無咁多掣肘，反而吸引到一班志同道合人士，短短兩年已有過百名會員，全部係專業人士如律師、工程師、建築師同規劃師，有人更從新民黨過檔，證明非政黨嘅專業路線有一定吸引力。
聽聞下一屆西貢區區議會最少增加兩個議席，其中一個喺正佢地盤日出康城附近，方國珊佔盡地利之便，佢實唔會錯過喇！
卓妮