前廉政專員湯顯明同前特首曾蔭權爵士一樣，都成為令人眼冤嘅厭惡性人物，功夫茶真係唔知佢哋可以厭惡到幾時。即係咁，貪湯醜聞長揭長有，最近又被翻起另一筆爛帳。
早於去年五月，律政司已經公布廉署展開針對湯顯明嘅刑事調查，不過廉署並冇向立法會完全交代有問題嘅酬酢以及送禮開支。有一筆從未曝光嘅開支發生於二○一一年九月初，貪湯搞咗場晚宴招待三十九國駐港領事，除咗開支超標，而且涉嫌收受利益，接受外交部駐港特派員公署派出嘅五名大廚，帶備廚具親臨廉署餐廳主理晚宴。至於社關處咯喎，就購入五隻總值接近八千元嘅名貴酒杯，送畀大廚作為贈禮。
對於接受外交部大廚服務，據講當時廉署內部有人非議，一方面擔心涉嫌收受利益，陷廉署於不義，另一方面恐怕違反餐廳專營合約、勞工法例同保險責任等等問題，有行政總部中高層職員甚至出面反對，結果係不得要領。
嗰場晚宴節目好豐富，包括餐前酒會、卡拉OK、打高爾夫球以及競酒比賽等等，總共使咗六萬五千元，人均開支接近一千二百元，超出廉署酬酢上限四百五十元逾一點六倍。社關處事後例牌用「拆單」伎倆將開支分單入帳，企圖掩人耳目。
所謂競酒比賽，即係參賽者鬥快飲啤酒，勝出獎品係一支價值近兩千元嘅巨型紅酒。以飲酒換取紅酒，聽落去係咪有少少酒池肉林嘅感覺？所以話啫，貪湯時代嘅廉署確係風氣敗壞，搞到金漆招牌岌岌可危。
唔怪得貪湯咁鍾意同內地官員打交道啦，如果唔係擁有非比尋常嘅關係，試問堂堂外交部又點會派出五名大廚為廉署提供破格服務呢？你知啦，負責反貪防腐嘅廉政專員理論上應該兩袖清風，比清流更清流，偏偏貪湯為人貪婪，而且好杯中物，你話佢唔係濁流都唔得啦。
好嘞，家陣嘅廉政專員已經換上白韞六，而且早就對貪湯展開刑事調查，究竟查到乜嘢呀？幾時做嘢呀？功夫茶最擔心嘅係查而不控，情況就好比貪湯嘅頂頭上司貪曾咁，廉署夠話展開調查啦，點知查咗近兩年都冇下文，唔知會唔會一拖再拖之後不了了之呢？
唔好怪功夫茶長氣，事關廉潔奉公作為香港嘅核心價值真係不容破壞，所以有必要再一次強調，絕代雙貪一定要嚴懲法辦，否則香港將會繼續沉淪。
國家領導人都講過啦，唔反貪防腐就會亡黨亡國。咁嘅道理同樣適用於香港，唔反貪防腐就會自取滅亡吖！