教育局官方網站月前刊登一篇專欄文章，把廣東話定性為「一種不是本港法定語言的中國方言」，如此隨口噏，當秘笈，完全不需查找不足，無視香港近百分之九十七本地人口的感情，烏鴉口大等天光，高官口大累街坊，梗係被人用鏗鏘嘅粵語九音問候喇！
猶幸教育局知衰，急急腳刪除網頁並道歉。作為教育局高官，理應不會「博大霧，走歪路」，而應該相信「一步一腳印，遲早都會到深圳」；老朽希望「唔得掂」局長買本本地學者李婉薇博士著嘅《清末民初的粵語書寫》，並用心細讀，當知廣東話在鴉片戰爭前後，粵語在珠三角一帶嘅權威。
粵語為中國七大方言系統之一，「廣州方言」最能保存夏聲，合於隋唐韻書切語，為他方所不及者，最明顯的莫過於平上去入四聲，各有一清一濁，他方之音，多不能分上去入之清濁；上聲之濁音，他方多誤讀為去聲，惟廣音不誤。至於廣東話嘅精彩詞彙，真係多到數唔晒，好似爆竹之聲「辟拍」，試以國音及粵音比較，前者是Peh Poh，後者Peck Park，你話廣東音幾咁精準傳神，全世界哪裏有Peh Poh嘅爆竹聲呢？如果有，睇怕都係濕水炮仗加上人口配音喇！
廣東話精深博大，廣東人對自己文化的獨特性感到驕傲，這是可以理喻的。美國語言學家包睿舜從七十年代起從事粵語語音學的研究，他以香港漫畫探討粵語寫作的論文頗受學術界重視。
內地有傳媒亦指出，廣東話才是正宗的漢語，「普通話」其實是被胡人奴化的語言。粵語是一套有完整的發音體系和標準的語言，教育局啲高官好心唔好咁廢柴，出嚟威，識搶咪，最弊叻唔切，搶到個手榴彈，分分鐘炸瓜自己！拋浪頭，當你流！