政情：行會排名鄭耀棠插水
香港大學民意研究計劃尋日公布最新行政會議成員排名調查，兼任直選立法會議員嘅葉劉淑儀繼續蟬聯最高知名度兼評分嘅行會成員，林煥光、陳智思、李慧琼同羅范椒芬緊隨其後。至於去年因為接受航空公司款待豪遊法國醜聞、以超低分「掹車邊」罕有「榮登」五大市民最熟悉行會成員嘅工聯會榮譽會長鄭耀棠，喺今次調查終於打回原形，跌出五大排名，被重新上榜嘅陳智思取代。
去年暑假，行會及立法會議員「九男女」被踢爆接受航空公司款待，免費偕妻帶女豪遊法國引起軒然大波，棠哥更「一枝獨秀」成為唯一涉事嘅行會成員，兼拒絕「回水」退還款項，為市民所熟悉，所以能夠以四十一點六超低分，躋身「五大」議員之列，唔知情嘅市民仲以為佢好勁，實情係以醜上榜。
四個月過去，棠哥行蹤亦回復「低調」，雖則話行會成員毋須好似直選議員咁，郁啲就爭住大聲疾呼「搶收視」，但作為代表勞方權益嘅工聯會元老，棠哥喺過去多次勞工權益爭議上都完全冇影。
虐傭案及積金對沖 粒聲唔出
遠嘅唔講，近嘅就有印傭Erwiana懷疑被虐案同取消強積金對沖機制嘅爭議，棠哥不但未有為外傭出頭，就連幫全港打工仔出句聲都冇。
不過，棠哥尋日終於瞓醒，趁出席工聯會新春團拜時補鑊，承諾下月二十四日舉行「武林大會」，約埋一眾勞方代表商討取消強積金對沖機制嘅詳情，更唔排除邀請商界代表出席。棠哥仲幫忙澄清，話當年立法時，勞方從來冇贊成過設立對沖機制，叫做為工聯會出番啖氣。但依家先至出聲，會唔會遲啲呢？
另一名低知名度嘅就係立法會議員林健鋒（Jeffrey），相對同為「雙料議員」嘅葉太同「三料議員」李慧琼都名列「五大」，Jeffery就長期徘徊榜尾「五大」，直至最新調查先攀升至第九位。做咗咁耐議員同行會成員都維持咁低知名度，功能界別議員果然都係「視民望如浮雲」。