中環出更：劉詩昆掃玩具與幼兒園分享
農曆新年長假，唔少人趁機外遊輕鬆吓。卓妮前日年初四就喺機場遇到鋼琴大師劉詩昆同「鋼琴公主」孫穎結伴同遊，原來佢哋一早就約咗班朋友去日本沖繩玩，可能未到登機時間，佢哋喺機場各自購物，劉詩昆去咗睇玩具，而孫穎就去咗買書。
劉詩昆喺玩具店內左揀右揀，逐件玩具仔細研究，睇咗成十五至二十分鐘，搞到卓妮都非常好奇，皆因佢個孫都已經十八歲，仲係紐約讀緊設計添，點解佢會喺度買玩具呢？唔通送畀人？原來唔係，其實佢除咗開琴行外，仲喺上海浦東開幼兒園，為咗物色啲靚玩具擺喺幼兒園，於是養成平日四圍挑選玩具嘅習慣，最誇張嗰次仲喺深圳買咗成架貨車嘅玩具返上海添！
臨上機都有斬獲
據悉，劉詩昆上海間幼兒園走貴族路線，無論校舍同球場都有中學嘅規模，有部分導師仲係由上海教育局推薦，無論音樂底子、教育經驗及熱誠都係相當豐富。孫穎坦言，有諗過喺香港開番間幼兒園，但香港地方太細，好難搵到一個合適地方可以凸顯到佢哋間幼兒園嘅品牌氣派喎。
孫穎又話，劉詩昆每次睇玩具就會睇成半小時，所以佢哋趁臨上機前就索性分頭行事，孫穎自己去隔籬書店買書睇，而劉詩昆就繼續專心揀玩具，最後見佢買咗一袋玩具走，連去旅行都掛住幼兒園班小朋友，辦學真係唔簡單。
卓妮