賀年食品失色
寓意「搲銀」的瓜子、「步步高陞」的糕點為新春熱門食品，近年市面上更有不少創新造型與口味，為傳統食品增添新意，但食物安全卻備受關注。近日有市民在街頭攤檔購買綠茶味瓜子，發現瓜子遇水後會脫色並發出異味；亦有特別造型的預先包裝年糕被揭製造商資料欠奉。立法會議員要求食環署加強巡查，並呼籲市民光顧信譽良好商戶。
「睇見好似幾好味咁，咪買咗啲綠茶瓜子返嚟食，點知屋企個細路貪玩放咗啲瓜子落杯水度，杯水即刻變咗綠色，好得人驚！」家住屯門的羅太早前於區內一個攤檔購買綠茶瓜子，未料瓜子遇水即告脫色，且發出難聞異味，擔心瓜子所用色素對人體有害，「啲瓜子喺街邊檔買，成分、產地咩都冇寫，都唔知有冇問題！」
遇事難追究責任
至於張女士日前辦年貨時，亦發現市面上有不少預先包裝年糕賣相精美、顏色吸引，但仔細了解產品資料時，卻見部分年糕疑未有按法例於包裝上列出製造資料，「好似呢盒鯉魚形年糕咁，小朋友就最鍾意，但如果食完唔舒服就大件事，包裝上面連電話都冇個，想追究責任都難啦！」張女士要求食環署加緊巡查，確保市民食用健康。
「唔使擔心，啲瓜子就算用咗綠色粉上色都會甩色，未必對人體有害，但如果用工業用色素就唔係咁講法！」香港專業教育學院食物及營養科學課程主任及高級講師方麗影博士指出，工業用色素含水銀、鎘，甚至砒霜（即砷）等重金屬，人類服用後會影響腎臟功能，故一般會列入監管範圍，建議市民購買具營養標籤產品，並留意相關成分，「唔單只係色素，其他成分都要留意，好似鹽咁，好多賀年食品都好高鹽分，冇營養標籤好難預分量，食多咗對身體都唔好！」
立法會食物安全及環境衞生事務委員會陳恒鑌則要求食環署做好為食物安全把關工作，同時提醒市民光顧信譽良好商店，「新年大家都想食得開心，為咗平少少買咗有問題嘅嘢食又追究唔到，咁就好唔抵！」
違例可判監半年
食物環境衞生署發言人表示，任何人出售含有並非《食物內染色料規例》內准許染色料的食物供人食用，即屬犯罪。此外，現時在港出售預先包裝食物（獲豁免者除外）均受《食物及藥物（成分組合及標籤）規例》監管，包裝上須加上製造商姓名及地址等資料，上述兩項條例的罰則均為最高罰款五萬元及監禁六個月。
記者：陳倩儀、攝影：林永發、林松澧