政情：公民講場：兩年「一鑊」殺雞 港人唔再「禽」青

馬年來臨前夕，全港市民忽然冇活雞應節同開年拜神，但係同以往唔同，市民今次冇再聞「雞」色變，只係避開唔食活雞，唔通港人唔再鍾情傳統活雞？非也，敍福樓集團執行董事黃傑龍尋日就喺一個電台節目中表示，香港過去十年經歷五次殺雞，第一次就話連雞都唔敢食啫，但近年港人已食慣冰鮮雞，即使禽流感殺到埋身，都唔再怕食雞喇。怪就怪前食物及衞生局局長「周一鑊」在任八年，側側膊唔肯分流批發本港同內地雞，連累港人動輒受到內地禽流感疫情影響冇活雞食，難怪港人對殺雞好似已經冇哂感覺，連口味都被迫轉埋！