政情：「苗圃祥毛叔」自爆畀高永文救過
食物及衞生局局長高永文呢個農曆新年真係忙個不停，首先要應付內地供港活雞驗出禽流感事件，嚟緊又要應付流感高峰期、病人逼爆公立醫院急症室問題。不過尋日佢依然喺百忙中抽空，出席苗圃行動舉辦嘅「行路上廣州」起步禮，為百多位健兒打氣，期間同外號「祥毛叔」嘅高齡參加者敍舊，祥毛叔仲自爆高醫生係佢嘅救命恩人！
感謝醫好尾龍骨
高醫生係苗圃行動嘅「中堅分子」，為咗做善事身體力行，行路返內地不下十次，但今次佢就因為公務過於繁忙，抽唔到身跟隨大隊扶貧送暖，但亦都專程到場幫大家打氣同見下班老朋友，其中一位就係現年八十七歲嘅祥毛叔。
祥毛叔透露，佢哋兩個早喺十年前嘅苗圃行動中認識，之後祥毛叔跌親腰骨，壓住尾龍骨神經線，差啲搞到全身癱瘓，幸得高醫生幫佢診治，佢依家先至行得走得。不過高都勸告祥毛叔，話佢年紀有番咁上下，要量力而為唔好行太耐喇！