政情：標「准」工時 「十」畫未有一撇？
大年初三赤口不宜拜年，工聯會立法會議員陳婉嫻（嫻姐）就去咗黃大仙廟許願，祈求新一年幫全港打工仔爭取更多權益。不過正當嫻姐攞住張「訂立標準工時」嘅大桔紙牌諗住許願時，有人就發現「標準工時」入面嘅「準」字整咗做「准」字，即係少咗下面個「十」字。莫非有求必應嘅黃大仙想暗示畀嫻姐知，標準工時立法「十畫都未有一撇」？
嫻姐盼勞資「有傾有講」
嫻姐話，馬年嘅願望係希望僱主同打工仔可以「有傾有講」，盡快落實全民退休保障、標準工時立法，同埋取消強積金對沖機制，等打工仔女退休時有多啲錢喺手。佢又話勞資關係從來都係互為因果，僱主應該要諗通啲，唔好吓吓只顧自己，如果打工仔畀人遣散多幾次，所有退休金畀人對沖晒，只會逼佢哋攞綜援，最終受害者都會係一眾交重稅嘅企業老闆。