政情：今日你上鏡：盧偉國扮財神成頭汗

今個農曆新年氣溫閒閒哋都有廿幾度，係自○七年以來最熱嘅農曆新年。工程界立法會議員盧偉國（WK）尋日扮財神落區，向市民大派朱古力金幣利是時，早已做足準備，裏面淨係着住件恤衫，但係都仍然畀件財神衫焗到成頭汗。佢話舊年天氣比較凍，入面着咗幾件衫都凍到不斷打冷震，今年天氣就反常地和暖，佢企喺大埔墟站派利是，派咗唔夠幾分鐘已經標晒汗。不過見到市民反應熱烈，短短半個鐘已經派出超過二千封利是，佢話幾辛苦都係值得。而WK生肖屬龍，佢自言「龍」同「馬」可以合組成「龍馬精神」，所以屬龍嘅今年一定會好意頭喎。