中環出更：祥哥盛讚on.cc東網資訊多上載快
政界名人繼續激讚東方報業集團旗艦網站「on.cc東網」好睇。新界社團聯會主席兼元朗區議會主席梁志祥（祥哥）盛讚「on.cc東網」資訊多、上載快，真係值得大家睇多啲。祥哥又向東網及東方報業集團旗下刊物嘅讀者拜年，祝願大家馬年行好運，事事如意，佢強調馬係有活力嘅象徵，所以特別恭祝大家今年活力十足，身體健康！
祝願讀者馬年行好運
祥哥趁尋日大年初三假期，去咗元朗一個有機農莊行吓。今年施政報告提出要發展本地農業，祥哥話其實喺去年年尾，元朗區議會曾協助當地農民，喺元朗西鐵站附近搞過一次有機農墟，反應非常熱烈，佢哋現正爭取將活動變為恒常性，每個周末都喺元朗搞一次有機農墟，希望相關政府部門盡快開綠燈批出用地，當中首選係元朗西鐵站附近，次選就喺元朗劇場旁邊搞。
講起本地農業，祥哥指近年有愈來愈多內地不法之徒，專程來港狂砍香港出名嘅香樹，再運返內地作檀香木材。立法會放完農曆新年假後，佢將會喺大會提出口頭質詢，要求當局加強打擊有關不法行為，以及喺梅窩等種番啲相關品種嘅樹林。
卓妮