中環出更：名人解車公靈籤籲融和 禍變福
鄉議局主席劉皇發前日向車公為香港求得一支中籤，當中提到「禍不空生自有招」，令市民紛紛揣測馬年香港是禍是福。卓妮尋日喺沙田馬場遇到多位政商界名人，佢哋不約而同指出香港本身就係一片福地，認為港人只要少啲爭拗，多啲融和，就算有禍都會變成福。
尋日大年初三，馬場人頭湧湧，皆因唔少人都湊熱鬧入去睇賀年馬，感受節日歡樂氣氛。其中海皇粥店集團執董蕭楚基（Caecage）表示，今年特登留港過年，貪本港年初一至年初三都特別有氣氛，又話前日佢都有去車公廟，不過就冇求到籤。對於劉皇發為香港求得嘅中籤，Caecage就相當樂觀，話香港係片福地，就算有禍最後都會變成福，最希望香港社區同各界融和，唔好咁多爭拗。
心境平靜 能解難題
同場嘅商界助更生委員會執行主席何偉權亦所見略同，認為只要港人心境平靜、愛社會同愛國家，就乜嘢問題都可以化解到，唔需要過分揣測支籤講乜。講到今個農曆新年冇新鮮雞食，何偉權話一啲都唔介意，認為雖然新鮮雞好味啲，但只要活用唔同嘅烹調方法，一樣可以將冰鮮雞整到好好食，例如鹽焗雞或者豉油雞咁，食冰鮮雞過年一樣咁開心。
卓妮又見到玩具公司太子爺潘偉業（Albert）同太太鄺晶晶（Akiko）。新一年喜上加喜佗住個馬年BB嘅Akiko，即將榮升媽咪，但身材依然fit爆，真係羨煞旁人。懷緊第一胎嘅佢直言現時非常緊張同埋期待，已經睇咗好多資料同買好晒BB用品做準備，仲連BB嘅英文名都改好，至於中文名就要等老爺幫手諗吓喇。即將做爸爸嘅Albert亦緊張到晚晚同仲喺太太肚裏面嘅BB傾偈，佢話BB每一次聽到佢把聲，就會有好大反應，即刻大力踢媽媽個肚。佢自言已做好心理準備，預咗BB出世之後會冇覺好瞓，承諾全力幫太太湊BB。
馬場常客，自細已經跟祖父丁炳星接觸馬匹嘅陽光勵進會社長丁志威（Roy）表示，佢啱啱喺大年初一以約七十萬港元，購入咗一匹新西蘭良駒，令佢家族名下嘅馬匹數量增添至四匹。Roy暫時幫呢隻一歲短途馬改咗個名叫「初一」，貪佢好意頭又易記。
卓妮