挨年近晚自然係辦年貨嘅高峰期，不過大家又有冇諗過，其實辦年貨係一種苦差，尤其係去到人山人海嘅旺區，嗰一種寸步難移嘅情況確係苦不堪言。
大家千祈唔好以為只有市區先至人頭湧湧喎，家陣連新界都係咁墟冚，甚至猶有過之添，事關內地同胞個人遊已經識得走去元朗及上水等地掃貨。呢，內地網民仲非常之咁精明，自製一份「香港辦年貨攻略」，詳盡分析如何搭車直達元朗掃平貨。你知啦，由福田口岸過關坐小巴去元朗，肯定快過去九龍同港島，對於南下來港嘅內地同胞而言，絕對係打醬油嘅一條捷徑。
於是咯喎，元朗大馬路就此被攻陷，大量煲冬瓜嘅內地同胞攜帶手推車橫衝直撞。有關注團體估計，區內掃貨嘅內地旅客勁升三成，搞到本地居民出街舉步維艱。無圖無真相，網上近日瘋傳幾張元朗大馬路水洩不通嘅圖片，顯示掃貨兵團猶如狂風掃落葉，人多到幾乎要逼爆玻璃。
咦咦咦，咪住先，功夫茶忽然想起十幾年前中環蘭桂坊元旦人踩人事件，若然元朗大馬路人潮如鯽，會唔會出現人踩人危機呀？當年蘭桂坊死傷枕藉，慘痛場面依然歷歷在目，若然悲劇不幸重演，你都咪話唔恐怖。
本報記者一向求快求真，當然要去現場視察環境啦，得出嘅結論係途人猶如沙甸魚推推撞撞前行，記者不時被年貨客嘅手推車碰到，原本需時十分鐘嘅步程，搞到要四十五分鐘先至行完。
至於上水掃貨熱點石湖墟新豐路又點呢？路面逼爆嘅情況相差無幾，最大嘅分別係石湖墟原有嘅街坊小店幾乎全部消失殆盡，家陣變晒迎合內地同胞口味嘅藥房、護理用品店以及賀年食品店，所賣嘅貨色大同小異。正正因為咁，上水居民想買日用品咩，有必要老遠去到粉嶺入貨，你話唔悲哀就假。
唔使多講啦，肯定又會牽扯到中港矛盾，有人以「元朗淪陷」嚟形容成件事。其實又唔難理解喎，畢竟內地旅客一多就會造成人車爭路嘅危險場面，本地居民要求「畀條生路行下」都唔係好過分啫。
講到呢度，不期然想起「光復上水站」嘅狙擊水貨客行動。計功夫茶話齋，特區政府真係要想想辦法疏導人流，否則中港矛盾隨時火燒連環船。有人提議過，喺北區設立一個專門招呼內地客嘅購物區，等一心打醬油嘅佢哋掃完貨即走，唔使湧去各區導致路面擠塞，加劇中港矛盾。咁嘅提議其實有得諗喎，一方面賺到財源滾滾來嘅人民幣，另一方面又能夠紓緩旅客逼爆街頭嘅壓力，何樂而不為呢？總好過家陣坐以待斃吖！