政情：路福西復售 搶購潮降溫
狼公仔「路姆西」（Lufsig）本來無乜人識，但月前被「一掟成名」後隨即掀起搶購熱潮，雖然宜家家居將狼公仔改名為「路福西」，但市面仍一狼難求。事隔個半月，Lufsig尋日復售，有二千隻狼公仔應市，有市民仲專登早上六點半鐘去排隊購買。雖然即日售罄，但今次搶購冇上次咁犀利，唔知係咪同熱潮減退有關。
二千隻狼公仔之中，銅鑼灣分店就有七百隻配額。雖然店方已經提早喺朝早九點半鐘派籌，但有市民六點半鐘已經到場排隊，之後更出現排隊人龍。排第二嘅麥先生話，上次錯過咗買唔到Lufsig，所以今次誓要買到為止。對於Lufsig嘅中文名已經唔係以前叫嘅路姆西，但麥先生就話一啲都唔介意，事關有網民話「福」音同某個四字英文粗口發音相似，依舊咁有玩味咁話。
店方喺半個鐘內派出超過二百五十張籌，開店後十分鐘內售出超過一百隻。截至尋日下晝三點鐘，宜家家居喺社交網站宣布全線狼公仔再度售罄，想撲狼公仔嘅市民要等到三月底先有機會喇。