二○一四至一五年度財政預算案下月就揭盅，正當市民關注財政司司長曾俊華（鬍鬚曾）今年會否繼續「派糖」，但其實預算案已暗藏「拉布」危機，皆因去年有份拉布嘅立法會議員「長毛」梁國雄有意今年重施故技迫使政府推行全民退休保障計劃。據知長毛決心響應學民思潮硬銷嘅五區總辭、變相公投方案，即使短期內未能重返立法會亦在所不惜，誓要以「拉布」作為「告別作」，睇怕鬍鬚曾今年繼續頭痕喇。
據了解，其實鬍鬚曾早已聞到陣火藥味，並已積極諗計睇吓點樣應戰，但眼見決定拉布成敗嘅關鍵人物、立法會主席曾鈺成近來同泛民主派愈行愈埋，加上去年剪布嘅決定獲終審法院接納上訴申請，政府中人擔心去年勇猛「剪布」嘅曾鈺成，今次為免得失泛民而「剪下留情」，令剪布之日遙遙無期。
政府中人對此都無可奈何，慨嘆港府可能真係要重演美國聯邦政府去年因為眾議院講唔掂數而一度「停擺」嘅鬧劇咁，任由全港十六萬公務員「冇糧出」兼停止公共服務，將港府置之死地先有望扭轉拉布亂局。不過，長毛拉布都唔係冇損失，事關佢一旦辭職，除咗逾五十萬元約滿酬金凍過水外，仲因早前已修例限制辭職議員半年內不能再參選，換句話佢嘅議員生涯亦暫告一段落。