政情：利益申報涂仁嚴人寬己

稱申報贊助估值有難度

立法會議員個人利益監察委員會尋日開會討論收緊議員利益申報制度嘅調查結果，在申報海外訪問利益方面，秘書處就諮詢議員係咪唔同意喺申報個人利益時，填寫埋估計獲贊助嘅款額，點知得二十位議員同意，唔同意嘅就有三十五位議員咁多，冇意見嘅就有三位，而白鴿黨、工黨同教育界議員葉建源就連表態都費事。

不過，咪以為唔表態就代表冇意見，根據秘書處收回嘅問卷顯示，白鴿黨六位議員包括有份豪遊法國嘅何俊仁（鐵頭仁）同涂謹申就話，要議員申報贊助嘅估值係有難度，估低咗又會被公眾質疑，所以不如淨係簡單申報住宿、交通及飲食安排就算。而同樣有接受款待嘅會計界梁繼昌都話，要佢哋估計贊助款項喺現實上好難執行喎。

修訂敷衍 無視公眾質疑

本身係委員會成員之一嘅范國威就建議，議員可以申報埋乘搭航班嘅座位同入住酒店嘅級數，或是外訪後再申報都好過唔報喎。不過，委員會主席葉國謙決定，應該根據議員意見作修訂，所以最後修訂嘅申報表格只係就咁加咗項「參加訪問的理由」就算。證明班議員根本唔想收緊利益申報機制，無視公眾質疑佢哋存在利益衝突嘅問題。

另外，去年委員會裁定鐵頭仁涉嫌漏報公司股份嘅投訴成立，但就因冇證據顯示佢係蓄意隱瞞而不作處分。雖然係咁，委員會決定日後嘅調查除咗證明議員係咪「蓄意」外，只要調查結果認為議員喺被投訴事項上存在「角色衝突」，有關議員都要受到處分。如果一早係咁嘅話，鐵頭仁當日就可能冇咁容易甩身啦！