港府環保政策經常畀人鬧垃圾，所以連處理垃圾問題亦阻力重重，寸步難行，如果唔係，擴建堆填區計劃都唔會屢敗屢戰又屢戰屢敗喇。正所謂，衰開有條路，環保政策失敗，垃圾徵費大計會唔會又係跪低收場呢？
嗱，都市固體廢物徵費公眾諮詢尋日結束，究竟市民嘅意見係點嘅呢？如果當局睇到調查結果，隨時嚇一跳。其中一項調查結果顯示，約六成半受訪者反對徵費，贊成嘅只有大約三成半；對於當局建議向三人家庭每月收取三十元家居垃圾費，表示反對嘅比率更加高達七成添，你都咪話阻力唔大。至於另一項調查，雖然贊成徵費嘅比率有五成四，比反對嘅四成四略高，但調查團體表明對計劃有保留，批評政府只係推行收費，卻無全套計劃配合，令人難有信心真正達到減廢目標。
所以話，港府真係失敗。垃圾徵費已經講咗咁耐，家陣仲有咁多市民反對，當局究竟點做嘢？又點推銷？最好笑嘅係，民調顯示多數人反對徵費，而高官就話主流民意支持徵費，市民應該信邊個先？定係兩個嘅講法都啱，垃圾徵費嘅宗旨係源頭減廢，污者自付，主流民意真係唔太抗拒，問題係當局配套不足，推銷無力，咪搞到愈來愈多市民反感囉。
歸根究柢，港產官僚成日警告再唔解決問題，遲早垃圾圍城，其實搞到今時今日嘅局面，始作俑者就係佢哋。係人都知，源頭減廢要成功，除咗垃圾徵費，仲要有其他措施配合，但係咁多年嚟，當局淨係識收錢，仲做過啲乜吖？廢物回收似有還無，強制分類影都未見，源頭減廢得個講字，港府靠把口推動環保，垃圾徵費計劃點可能唔阻力重重呢？
講開又講，港產官僚淪為官場廢物，又點止垃圾徵費備受爭議吖。擴建堆填區唔掂，興建焚化爐遇阻，廢物回收緩慢，搞到香港垃圾為患，連深圳同胞都頂唔順，發起「抵制香港垃圾山簽名行動」，你話醜唔醜吖。各位垃圾官僚，知恥近乎勇吖，快快做好你哋份工，唔好再令香港丟架喇，唔該。
老實講吖，為咗環保，市民其實唔介意付出，問題係當局亦要有承擔至得。嗱，施政報告提出成立十億元「回收基金」，推動回收業持續發展，總算踏出正確一步，至於成效如何，就係睇港產官僚嘅執行能力嘞。最怕垃圾官僚繼續得過且過，有回收基金都係嘥氣嘅咋！