勞福局搵到副局人選
雖然消息滿天飛，但我哋聽到可靠消息，話勞工及福利局近日都搵到副局長人選，加上本報尋日報道，指發展局搵咗前候任特首辦項目主任馮英倫做政治助理，預料問責班子有望齊晒腳。
特首梁振英前年組班時，親自搵陸恭蕙做副局長，睇中佢做過立法局議員，比起只得專業人士背景嘅黃錦星，政治履歷較豐富。咁又唔怪得嘅，皆因有環保團體中人話，當年黃錦星上任後出席酒會，有人祝賀佢做局長，但佢竟然同對方講：「將來靠你搞政治工作啦，我就做政策工作」，佢做得局長，竟然冇諗過做政治工作？唔會咁單純吓嘛？難怪之前佢搞擴建堆填區搞到一鑊泡啦！