政情：蔡冠深創港韓商貿協會
近年韓風勁吹，來自韓國嘅產品同流行文化都令港人趨之若鶩。中華總商會永遠榮譽會長蔡冠深有感港韓之間嘅貿易投資商機無限，在韓國駐港總領事趙鏞天嘅穿針引線下，聯同居港韓商同本地生意人，成立港韓商貿協會，並擔任創會會長，以期為港韓商貿合作謀求雙贏之道。
文化互滲 合作機會多
蔡冠深話，韓國流行文化不但奇峰突出，就連工業產品亦令人刮目相看，無論大如船舶，小至手機，港韓兩地都有好多合作機會。佢話，好多韓國貨品質優良，但係港人多數不諳韓文所列嘅使用說明因而卻步，倘若韓商在包裝上加添中英文說明，相信韓國產品在港嘅銷售空間將會更大。
講起風靡青少年嘅韓國流行文化，趙鏞天話，過往香港嘅文化產業亦曾盛極一時，例如佢讀大學時嘅港產電影相當受歡迎，周潤發與成龍都係街知巷聞嘅電影明星，但可惜時至今日，港產電影委靡不振，佢讚揚香港電影製作認真，希望能再復往日嘅光彩咁話。