政情：楊立門唔撈多人等上位
有「政務官歌王」之稱嘅民政事務局常任秘書長楊立門（Raymond）已經申請退休，而且仲會喺今年年中就開始退休前休假，明年就正式離開政府呢個熱廚房。雖然外界對佢退休有唔少揣測，但對於一眾政務官嚟講，就可能係一個喜訊喇，皆因官場中常任秘書長呢個職位一直都係「供不應求」，如今Raymond退休讓位，其他人就有望出台甚至上位喇！
區璟智栢志高都會走
Raymond加入政府三十幾年，有消息話佢已經向民政事務局申請退休。可能因為喺官場已流傳多時，有指佢同政務司司長林鄭月娥不咬弦，喺前年特首選舉期間發生嘅西九填海區概念規劃比賽風波中，又懷疑佢幫「貪曾」前特首曾蔭權爵士「批梁挺唐」，所以佢退休嘅消息一傳出嚟，就惹來外界唔少猜測，認為佢同政府中第一、二把交椅都唔多妥，先至被迫退落嚟。
不過，其實Raymond離政府公務員五十五歲退休年限不遠，佢依家已經五十三歲半，今年中就踏入五十四歲，加上累積咗一年假期，明年中就啱啱五十五歲，計落其實都差唔多時間可以申請退休喇。連同同樣最快會喺今年退休嘅財經事務及庫務局常秘區璟智同運輸及房屋局常秘栢志高，屆時會有三個常秘職位空缺，預計將會掀起新一輪官位調動。
馮程淑儀容偉雄久候
喺官場中有唔少等候上位多時嘅官員，好似現任康樂及文化事務署署長馮程淑儀同旅遊事務專員容偉雄就係當中一分子。早前政府提議架構重組並設立文化局，就一度盛傳馮程淑儀會出任文化局常秘，可惜架構重組唔成，馮程淑儀更上層樓一事亦只能一拖再拖。
除咗等上位啲人外，另一位被視為官場叻人嘅前財經事務及庫務局常秘應耀康之前就因為屋企有事而提出無限期休假。如今佢已經處理完家事，原本都想回巢，可惜政府中暫時冇位，之後就被借調咗去競爭事務委員會，相信隨住三位常秘陸續退休，佢都有望可以歸隊喇。