今屆立法會喺短短十五個月內先後發生四次流會，而且議員嘅流會藉口日新月異，連前公務員事務局局長王永平（平叔）都有好大意見。佢尋日率先提倡日後每次流會，議員應該要定額罰款一萬元。平叔解釋，議員依家月薪係九萬元，仲未計其他津貼，所以將懲罰議員嘅金額定於約月薪百分之十，相信議員可以負擔且具懲罰性。佢又強調，議員職責就係開會，加上佢哋係自己要求加入有關事務委員會，因此促請議員要正視流會問題，不可以再側側膊就算數喎，呢番說話認真係擲地有聲。
