申訴專員黎年任期將於三月底屆滿離任，申訴專員公署已公開招聘繼任人。黎年尋日主持公署記者會時，就被問及點解唔續任，係咪專員個位好難做？抑或涉及政治因素呢？佢即時笑笑口話，唔續任只係個人因素，因為續任一做就做多五年，對佢嚟講時間太長。佢話原因就係咁簡單，叮囑大家唔好亂揣測，仲話自己「唔係唔開心咁離開」。
黎年形容，擔任申訴專員五年以來好開心，因為得到同事嘅支持。至於尋日係咪最後一次以專員身份出席公署記者會時，佢就將個「波」拋畀台下嘅同事，笑說：「要睇吓同事工作進度，如果過咗三月底未有報告發布，就會係另一個人（主持記者會）。」至於離任後有咩新發展，佢就話好多嘢諗緊，未知道喎。
另外，尋日公署調查報告批評屋宇署以特別程序處理涉及名人僭建嘅進度緩慢，因而令黎年即場被「翻舊帳」，指佢曾被揭發住所大廈未有按屋宇署指令修葺斜坡。黎年強調，其住所大廈涉及嘅並非僭建，而係有斜坡工程要做，而工程已經完成喇。