流感病患固然多 更恨醫護人手少

醫院管理局指出，持續寒冷天氣令到慢阻肺病、哮喘、心臟衰竭或中風人士前往急症室求診人數持續高企。呢，踏入流感高峰期之後，公立醫院急症室每日平均有六千零九十九人求診，高於去年同期五千八百多人。好似一月六日咁吖，公院急症室錄得七千零五十人次求醫，簡直破晒紀錄，嚴重及危殆個案亦較往日增一成半。由於病人蜂擁而至，整體內科病床平均使用率單日高達百分之一百二十，個別醫院更加高至百分之一百四十七。病人多成咁，急症室輪候時間往往係四至六粒鐘，凌晨睇急症，隨時要等到天光。

醫院人滿為患，醫護人員肯定倒瀉籮蟹，有乜嘢因應措施呢？醫管局救亡嘅辦法係暫停部分非緊急手術，額外提供七百張病床以及縮減門診新症，另外又增加一千五百個普通科門診名額疏導輕微病徵市民，以免全部湧去急症室。醫管局預料，大約會有一成非緊急手術被延誤喎。

大家唔好忘記吖，內地H7N9確診病例有急升嘅趨勢，浙江同深圳前日都有三宗新增個案，而台灣第二宗確診來自江蘇嘅病人不治。世界衞生組織就話嘞，中國繼上周出現至少二十四宗病例之後，近日又多二十三人染病，顯示H7N9病毒猖獗，促請內地加緊源頭追查。萬一，如果，若然，一個唔好彩H7N9大規模殺入香港，醫管局能唔能夠應付，實在令人懷疑。

其實計功夫茶話齋，病人太多無疑係事實，不過另一個殘酷嘅事實係醫院一向人手不足。喂，呢個情況持續咗好多年啦，醫生一年復一年嗌救命，護士一年復一年捱到病，功夫茶多年以來不知幾多次呼籲過醫管局正視問題，可惜情況依然冇乜顯著改善。家陣弊啦，人手不足嘅問題更加由於這個冬天特別冷而進一步凸顯眼前，你話死火唔死火吖？

講來講去，又係前朝政府貪曾遺禍囉，大家記唔記得前特首曾蔭權講過要打造醫療產業呀？結果到頭來乜鬼都冇，就算唔係流感病患者逼爆醫院，本地原有嘅醫療產業都應付唔到來港分娩嘅雙非孕婦啦，結果迫使特區政府推出零雙非政策。

即係咁，流感病患固然多，更恨醫護人手少，人手不足嘅問題一日唔解決，逼爆醫院嘅情況就會無日無之。所以咯喎，食衞局局長高永文必須好好思考一樣嘢，香港嘅醫療系統甩皮甩骨病咗好耐喇，及早急救啦，唔該！