特首梁振英早前出席施政報告地區論壇時，遇上激進示威者掟生雞蛋，但最後誤中副車擊中坐喺旁邊嘅財政司司長曾俊華（鬍鬚曾），搞到佢成件運動外套都係蛋汁，非常狼狽。鬍鬚曾近日同傳媒提起呢件瘀事時，自爆件外套到依家都仲未洗！皆因件外套一早就被警方收起咗，作為將來可能起訴有關示威者嘅呈堂證物。鬍鬚曾自言，就算警方將來畀番件衫佢，肯定都已經臭晒着唔番，中完蛋又要破財。
不過，鬍鬚曾話佢其實已經算好彩。首先當日上午佢去咗玩西洋劍，唔夠時間返屋企換件靚西裝出席論壇，否則損失仲大。其次係事發時佢被在場傳媒嘅鏡頭燈光同大批警員遮擋咗視線，根本乜都睇唔到，純粹聽到聲有人搞事，於是就稍為向左邊望咗一吓，隻雞蛋就喺呢一刻拋物線咁「啪」一聲擊中佢嘅右上額位置。如果唔係呢一望，估計隻蛋會中正佢額頭同塊臉。
喺美國讀書嘅鬍鬚曾又笑言，香港啲細路唔興玩棒球，掟嘢都唔識得發力，如果同樣事件發生喺美國，佢隨時會被啲棒球好手掟到入醫院都似。佢咁講法，係咪諷刺香港嘅示威者未夠班呢？