政改三人組近日為咗推銷政改諮詢，手法無所不用其極，搞政改飯局都未夠，仲要喺農曆新年前夕推出揮春同利是封宣傳。律政司司長袁國強尋日就聯同政制及內地事務局局長譚志源、行政會議成員陳智思等人，率先到中環派發「和氣生財」揮春，據聞佢哋之後仲有多款揮春推出，包括印有「心想事成」、「人人有商量」以及印有「福」字嘅利是封。不過，「人人有商量」呢張揮春就認真騎呢，唔知同農曆新年有乜關係呢？
