政情：養和建分院 居民怕「輻」到
有富豪醫院之稱嘅養和醫院，近年除咗本身嘅擴建計劃外，仲決定喺筲箕灣阿公岩建設醫療中心，正等待城規會批准。不過，由於新院將引入香港首套用來治癌嘅質子治療系統，呢套先進系統就惹來地區反彈，有地區人士擔心洩漏輻射，影響當區居民健康。質子治療系統係高科技產物，睇怕養和要解釋畀市民聽有無危險，都唔係一時三刻嘅事，如果有政黨藉此而去做騷，咁就真係有排搞喇。
近學校住宅 樹根促交代
根據養和醫院向城規會提交嘅計劃書，筲箕灣嘅醫療中心會有先進設備，包括兩台質子治療系統，靠透過高能量質子碰撞殺死病人嘅癌細胞，但因為始終係放射性治療，點都會產生輻射，究竟呢部機器對附近空氣、水源、土壤有冇負面影響，就惹起當區市民質疑。聽聞連衞生署都要求養和提交輻射評估報告，證明街坊呢個質疑唔係講笑。
本身係東區區議員嘅立法會議員鍾樹根就話，最近的確收到唔少街坊投訴，話好擔心養和分院會有輻射洩漏，又話出咗事先挽救就太遲喇。樹根話，筲箕灣阿公岩道有學校，又有民居，一旦真係發生輻射洩漏，後果真係不堪設想，今日佢會落區收集街坊簽名，希望養和盡快向市民解釋有冇輻射影響，如果喺未有清晰解釋前，希望城規會唔好通過有關計劃喎。
院方指輻射量屬安全水平
據聞養和已經向城規會提交環境評估報告，講明院方會做足安全措施，例如質子治療室嘅牆身、天花、地板等物料都會特別加厚，確保殘餘輻射水平符合香港法例同國際水平。
我哋就此向養和醫院查詢，院方話質子治療原理主要利用氫氣作原料，唔係核設施。雖然質子儀器的確產生輻射，但據目前評估，輻射量屬安全水平，一年產生輻射量仲少過香港來回紐約搭飛機嘅輻射量。至於呢個答案最終能否令區內市民收貨，相信好快就知道。