中環出更：追問象哥「對沖」 曾德成無厘頭
當民政事務局局長曾德成遇上立法會議員黃定光（象哥），二人有咩好講？曾德成尋日開完立法會會議後，離開之際同象哥撞個正着。但佢哋寒暄幾秒後，曾德成突然九唔搭八問象哥「『對沖』嗰度你幫邊便o架？」搞到象哥一臉茫然，唔知德成局長講乜。原來曾德成係幫勞工及福利局局長張建宗（小肥張）同財經事務及庫務局局長陳家強，追問象哥喺取消強積金對沖機制議題上幫邊便，認真冇解。
象哥聽到「對沖」一時醒唔起講緊強積金對沖機制，仲反問曾德成「咩幫邊便？」曾德成先至解畫話：「你老婆（林淑儀）工聯會（會長）o架嘛！」不過，未等得切象哥回應，曾德成已經絕塵而去。唔知曾德成返去係咪要向小肥張同陳家強匯報「會談」結果呢？
黃指同太太各有各撐
象哥事後向卓妮透露，佢同太太返到屋企就唔講公事o架喇，總之佢作為進出口界議員兼中華出入口商會榮譽會長，佢有佢撐資方立場，太太就撐勞工，但都無傷兩口子感情。
卓妮