中環出更：城大30周年慶 校友最念人情味
城市大學尋日舉行三十周年校慶活動啟動禮，近五百名校董同校友聚集喺新落成嘅學術樓慶祝，包括合和實業主席胡應湘、校董會主席胡曉明、城大副監督梁乃鵬及校長郭位等，非常熱鬧。一眾校董同校長喺啟動儀式後，仲不停被班校友捉住影相，分身不暇。卓妮四圍望，發現原來北京殘奧會馬術比賽香港選手葉少康同香港社會創投基金創辦人魏華星都在場，二人都係城大校友，開心聚首一堂。
城大嚟緊會有一連串慶祝活動，包括校慶晚宴、校友日、國際會議、講座及可持續發展高峰會等。胡應湘話好開心見到校園走向國際化，仲讚學校嘅運作方式日益環保。對於近日成立獸醫學院嘅問題，胡曉明話，其實唔係事在必行，但依家所有大學都有教學自主，學校會繼續向呢個方面發展，會自資搞研究生課程同做相關嘅研究喎。
葉少康魏華星懷舊
同場仲有唔少名人校友，好似葉少康及魏華星。原來二人以前都曾就讀工商數量分析文學課程，而講起昔日喺城大生活嘅點點滴滴，佢地異口同聲話，印象最深刻就係學校嘅「人情味」，直到依家，佢哋仍然經常與學校職員或同學聯絡。不過，佢哋就話當時嘅校舍細好多，邊有依家咁大吖。
唔知係咪受學校嘅人情味影響，佢哋都好關心青年人。葉少康話，依家嘅大學生好多時會將自己嘅缺點同人哋優點比較，但其實每個人能力都有限，應該要學識搵一樣自己自豪嘅專長發展，好似佢咁就揀咗騎馬。而魏華星就鍾情跑步，佢透露嚟緊三月會有一個街跑活動，會與荷蘭宿舍等缺乏家庭照顧嘅年輕人，透過馬拉松鍛煉，培養佢地堅毅同積極嘅態度。
卓妮