政情：政改公聽會 泛民「冇影」
立法會政制事務委員會舉行多場政改諮詢公聽會，尋日嗰場都有約一百六十個團體及人士報名參加，但出席嘅議員就寥寥可數，泛民主派議員更幾乎唔見影，搞到差啲流會。見到咁嘅情景，就連出席公聽會發表意見嘅人士都睇唔過眼，兩度有公眾人士要求議員劉慧卿等泛民議員點人數，但卿姐冇理會。而發言人士仲疑似爆粗，臨散會時仲有人喺會議室內周圍跑，唔怪得班議員都唔想嚟坐喺度開會嘥時間喇。
部分公眾人士發言粗鄙
發表意見嘅人士除咗要求點人數，部分後生仔言詞亦都幾粗鄙，又講粗口諧音。其中有人就話，特首選舉要由公民提名，否則就要「收皮」，亦有人話如冇公民提名，就係「荷蘭本票」咁，難以實現普選夢。而「制止路姆西再現協進會」主席陳國興仲話唔想再選出個冇認受性嘅「路姆西」、「西你路姆」咁話。結果就被主席譚耀宗話佢意有所指，隨即制止佢發言。面對咁嘅質素嘅發言，唔怪得班議員都唔想出席啦！