政情：中環出更：陳振彬以食會友 政商名人有口福

當晚Bunny包晒成個場宴客，多名新舊高官捧場，包括食物及衞生局局長高永文及副局長陳肇始、教育局局長吳克儉及副局長楊潤雄、商務及經濟發展局局長蘇錦樑、懲教署署長單日堅等。至於前高官除咗「媽打」李麗娟外，仲有保安局前局長李少光同藝人兒子李霖恩一家，而外號「蕭公子」嘅前規劃地政局局長蕭烱柱夫婦亦有捧場。至於商界名人就有中電企業發展總裁莊偉茵同夫婿黃楚權。

「媽打」公子獻車仔麵小食

年前創業開車仔麵檔嘅Chris，第一次參加派對，就拎咗百幾磅咖喱魚蛋、豬皮、蘿蔔及牛腩等公諸同好，結果兩個幾鐘就被賓客掃清光。其實一眾高官平時好少喺街邊拮魚蛋小食，派對有得供應，自然食得津津有味。好似高永文就最愛食豬大腸，而吳克儉就鍾意食豬紅同豬皮，至於媽打自己就最愛囝囝整嘅蘿蔔喇。媽打仲話，佢每個星期都會去囝囝嘅麵檔打躉兩日，主要係借個場同朋友開會，傾吓今年嘅慈善籌款大計喎。

馬逢國（右）罕有帶埋太太出席派對。

李少光（右一）與兒子李霖恩（左一）一家出席派對，相當溫馨。

當晚一眾嘉賓之中，卓妮仲見到立法會議員馬逢國罕有帶埋太太出席，而同場仲見到商界議員林健鋒同兒子林凱章、女童軍香港總監彭徐美雲等。主人家Bunny話，今年派對主題主要係為咗配合施政報告，為年輕人創造更多就業實習機會，預計今年暑假，會有逾萬個中港兩地嘅工作實習機會。佢寄語年輕人想創業成功，就要先練好基本功，用心學習每個細節，唔好為一刻成功而自滿，咁先會真正成功。

莊偉茵（右）與丈夫黃楚權恩愛拍拖到場。

蕭烱柱（右）拖埋太太黃樂怡（左）現身，作為政府前同事嘅李麗娟（中）當然要影番張相留念啦！

卓妮