漂白水顧名思義係用於漂白，而且由於漂白功能同時可以殺菌，所以有時又會用於搞衞生。好似十年前沙士瘟疫肆虐期間，大家都耳熟能詳嘅一個消毒方法就係「一比九十九，清潔好幫手」，一份漂白水溝九十九份清水，有助預防疫魔埋身。
既然漂白水有殺菌作用，假如人類唔覺意飲咗落肚，而且濃度高於一比九十九，會唔會產生乜嘢不良後果呀？對於呢個問題，元朗區甚至屯門區居民就好關心嘞，因為呢兩區嘅街坊最近發現咗一個超乎尋常嘅恐怖異象，食水竟然變咗漂白水！
元朗區居民尤其係村屋住戶，近日不約而同發現自來水發出濃烈刺鼻嘅漂白水氣味，每日好似用漂白水沖涼漱口，事件經過互聯網廣泛流傳引起熱議，而且牽連甚廣，連屯門區部分村屋居民都受到困擾，紛紛致電水務署投訴。
點知問題持續幾日都未見改善，有人甚至話飲水之後嘴角紅腫，惟有急急忙忙搶購樽裝蒸餾水代替自來水。水務署證實，前日收到元朗區三十八宗以及屯門區三十二宗關於食水有異味嘅查詢，即係一日七十宗。
既然引起咁大關注，水務署查成點呢？官老爺有乜講法？水務署話喎，檢測結果顯示，供應元朗區食水嘅凹頭濾水廠運作正常，經處理後出廠食水殘餘氯含量每公升約一毫克，喺元朗區抽取嘅食水樣本殘餘氯含量係每公升零點七至零點八毫克，即僅微高於去年平均值，冇出現異常情況，亦低於世界衞生組織《飲用水水質準則》對食水殘餘氯所訂定嘅健康標準，呼籲市民放心飲用。
喂喂喂，家陣係要你解釋食水變漂白水嘅問題呀，水務署一味強調殘餘氯含量正常，係咪九唔搭八呀？難怪網民批評水務署辦事不力，遲遲未能交代原因，查來查去都唔知發生乜嘢事。
好嘞，事件經東方報業集團連日報道之後，你估結果又點吖嗱？結果就係食水中刺鼻難聞嘅氣味明顯減少。正如元朗居民話齋，東方廣泛報道之後，水務署先至知驚補鑊，減少水中氯氣嘅含量。
所以話啫，新聞自由好重要，傳媒作為監督政府嘅第四權必須受到保障，不容官老爺借頭借路扼殺傳媒嘅生存空間。假如冇咗正義傳媒為民發聲，莫講話食水變漂白水吖，就算食水含有砒霜都隨時冇人理呀！
點都好啦，唔該水務署向市民清楚交代，唔好淪為「水皮服務署」，枉費納稅人供養！