特首梁振英（CY）尋日出席立法會答問大會，解答議員對施政報告嘅疑問，其中公民黨（公文袋）毛孟靜（阿毛）同陳家洛根本唔係根據施政報告內容發問。
阿毛先係批評CY鼓勵香港年輕人北上升學，質疑想搞「殖民洗牌」，之後又無厘頭問CY幾時會收番單程證審批權。CY揶揄阿毛「有與別不同嘅意見」，話持單程證來港人士主要都係為咗家庭團聚，如果佢將單程證審批權利交畀阿毛，相信都唔會否定呢項大原則，擺明就係想寸阿毛唔識嘢。
之後發問嘅陳家洛先係批評行政會議成員張志剛將中央同泛民嘅關係比擬做中日關係「不倫不類」，之後又質問CY如果想喺歷史留名，「係想學（羅馬尼亞前獨裁領袖）壽西斯古被人民唾棄推翻，定係好似（前蘇聯領袖）戈爾巴喬夫順應民意，推動真普選呢？」CY反駁佢嘅比喻先至係「不倫不類」，話香港情況同羅馬尼亞同前蘇聯等地完全唔同，唔可以咁樣攞嚟比。阿毛之後仲喺社交網站上嘲諷陳家洛嘅提問令佢打晒冷震，都唔知佢哋係咪同一個黨嚟嘅！