農曆新年將至，又係各大政黨落區派揮春同扮財神宣傳嘅好時機，聽聞今年政制及內地事務局都抄橋，大灑金錢宣傳政改諮詢，以增加市民對政改嘅認識。先有副局長劉江華同政治助理陳岳鵬落香港仔派政改單張，之後仲會拉隊去沙田聽居民意見。據聞局長譚志源都會喺農曆新年前落區派傳單，但具體日子同時間仲未定。政制局遲遲唔肯公布局長落區時間，莫非驚示威者會聞風而至？
除咗獨沽一味派政改宣傳單張外，當局為咗響應農曆新年主題，特意印製一輯有「人人有商量」嘅揮春，仲整咗大量三色筆周圍派，希望藉住派發紀念品順手宣傳政改。
唔少區議員都會喺所屬選區內擺街站寫揮春，期間可以順便同居民傾偈爭取支持。不過，據聞政制局就無諗住有樣學樣，因為「人人有商量」五個字筆畫都唔少，擔心局長寫極都寫唔完，又或搞到市民爭住索取，引起混亂就唔好啦！