政情：醫界「七君子」因小失大
食物及衞生局局長高永文前年七月加入政府前，曾連同六名醫學界中人連線報名參加二○一一年選舉委員會（選委會）選舉，被外界稱為醫學界「七君子」。事隔兩年多後選舉結果塵埃落定，最近突然先至有人提示佢哋嘅選舉開支申報有問題，原來每人平均漏報咗幾蚊，七君子知悉後即刻入稟高等法院申請選舉開支寬免，據聞粗略估計律師費最少要十幾萬元，平均每人要二萬多元，今次真係因小失大喇。
二○一二年特首選舉前夕，負責選出特首嘅一千二百名選委會選委須改選，當年未加入政府嘅骨科醫生高永文，連同另外兩名骨科醫生方津生同潘德鄰、泌尿科專科醫生葉維晉等人組成七人團隊，競逐醫學界選委三十個名額，其中七君子有六人勝出，得勝率超過八成。
入稟高院申開支寬免
本來七君子過去一段時間喺不同範疇都各自各精彩，其中高永文更獲邀加入梁班子出任問責局長，殊不知最近有關部門發現並通知七君子，佢哋嘅前年選舉開支單據報漏數，七君子經商議後決定入稟高等法院申請選舉開支寬免。
七君子之一嘅葉維晉接受查詢時話，其實每人選舉開支只係報漏咗幾蚊，之不過要修正番就要搵律師幫手，所以粗略估計每人攤分律師費至少要二萬多元。食物及衞生局發言人都證實，高永文等人已向法庭申請寬免，希望獲准許更正選舉開支申報書上兩大類錯誤，包括無心之失而造成嘅錯誤計算，以及申報某些開支時無一併遞交嘅發票同收據。發言人強調，即使有以上誤算或遺漏，七人選舉總開支仍在限額內，換言之未有超支。
查實喺普羅市民眼中，為咗報漏數十元又要搵律師，又要重新宣誓「補鑊」好似好勞民傷財。不過法律面前人人平等，漏報一蚊係漏報，漏報幾萬元亦係漏報。加上時移勢易，高永文已成為港府官員，凡事從嚴處理，呢個對於七君子特別係高永文嚟講，會喺政治上較少機會被人再「抽秤」嘅做法喇。