政情：中環出更：「瞓身」撐C Y 煥光唔話得
剛發表《施政報告》嘅特首梁振英（CY），尋日朝早一口氣連走兩場，就《施政報告》內容接受電台同立法會議員質詢。行政會議召集人林煥光（WK）身為智囊，亦一連兩日拉埋周松崗同鄭耀棠兩位行會成員坐觀眾席打氣，但WK落場兩日就瞓足兩日，唔通佢想透過「瞓身」支持CY？
周松崗鄭耀棠難頂走先
WK尋日準時十點半鐘落立法會坐定定聽會，但未知係咪行會公務繁忙，抑或太早開工，WK全程「釣魚」瞌眼瞓，不但無視CY發言，就連先後有泛民主派議員高叫口號被逐離場，WK都唔係次次知醒，似乎真係好攰咁喎。陪伴WK左右嘅戰友周松崗同鄭耀棠亦唔好得好多，周松崗起初先係瞓咗一轉，醒咗又不時玩電話，最後坐咗一個鐘都頂唔順走先；而鄭耀棠跟住周走，二人之後冇再返過嚟，留低WK孤零零坐足全程。
相反，唔少坐觀眾席嘅政治助理都抖擻精神坐定定聽書，好似教育局嘅施俊輝、政制及內地事務局嘅陳岳鵬同商務及經濟發展局嘅陳百里，以及多個政策局嘅新聞秘書都坐足全程唔敢「垂釣」，但眾人面上都係同一個呆樣。
卓妮