政情：中環出更：初賞內衣騷 葉建源拘謹
理工大學紡織及製衣學系尋日舉辦首個內衣時裝展，教育界立法會議員葉建源同紡織及製衣界議員鍾國斌（Felix）、時裝設計師何國鉦都有捧場。該學系首席教授及主任忻浩忠話，現場多位模特兒穿着嘅內衣係由三十三位就讀內衣專業嘅畢業生設計，共十二個系列。計計數加埋成七十二套，真係花多眼亂。完騷之後，葉建源同felix仲一齊討論內衣款式，大讚款式好靚，如果布質厚啲，真係着出街都得喎。
為人師表嘅葉建源今次係第一次獲邀睇內衣騷，見佢睇騷期間翹埋對腳，雙手疊埋放喺大脾上，好似有啲拘謹，唔知係咪覺得尷尬呢？佢話絕對冇喎，之後仲好細心分析內衣業界同大學教育嘅關係。佢話兩者聯繫其實好密切，經常都有人話大學教育同實際工業或商業脫節，所以佢呢日就特登嚟了解一吓，皆因紡織業界亦可以係大學教育發展嘅其中一個方向。
不過，卓妮留意到葉建源睇騷睇到放蚊，問佢覺得啲內衣設計靚唔靚，會唔會買番套畀太太，佢就笑笑口話冇諗過呢個問題喎。
鍾國斌猛影相笑晒
至於Felix，就一邊睇一邊用手機影相，仲笑容滿面，似乎幾滿意同學嘅作品。佢話如果喺洛杉磯、邁阿密等地方，呢啲內衣肯定就咁加條短褲就行得出街，又盛讚香港嘅設計師真係好得，建議下次應該訂個千五人嘅大hall嚟搞，唔止內衣，鞋、冷衫、皮草等都會有好多外國嘅買家有興趣。
卓妮