泰國，一個令香港人又愛又恨嘅國家。泰國，一個令外國人進退維谷嘅國家。泰國，一個令全世界左右為難嘅國家。
係人都知，香港人好鍾意去泰國旅行，貪佢又平又靚又正吖嘛，奈何泰國係一個經常示威嘅國家，唔係紅衫軍反政府，就係黃衫軍搞革命，今日推翻呢個，明日打倒嗰個，搞到永無寧日。最近咯喎，泰國又有大規模反政府示威嘞，反對派號召群眾浩浩蕩蕩上街參與「封鎖曼谷」行動，數以萬計嘅示威者將購物同商業區擠得水洩不通，交通陷入癱瘓狀態。
封鎖曼谷導致二百三十二萬人受影響，嚴重打擊泰國經濟。反對派揚言要以人民力量迫使看守總理英祿下台，不達目的誓不罷休咁話。部分強硬派示威人士仲話呀，英祿如果唔肯落台，將會圍堵證券交易所，甚至係負責航空交通通訊嘅公司。
既然局勢緊張，泰國亂成一團，身為遊客嘅香港人究竟應唔應該去當地吃喝玩樂呢？若然膽粗粗過到去先至發現機場淪陷，有冇可能得到援手平安歸來呢？所以話啫，泰國真係令人又愛又恨，進退維谷，左右為難。
基於安全起見，旅遊業議會今日會同本地外遊旅行社商討，睇睇是否取消農曆新年出發嘅泰國曼谷團。聽講喎，航空公司會彈性處理農曆新年出發嘅曼谷團機票，容許旅行社保留已預訂嘅機位三個月，畀旅行社靈活處理。而有啲旅行社已經宣布，取消所有泰國團至二月十五日，即日起至新春期間已報團者可獲全數退款，不收取手續費。
有一點令到旅遊業界相當氣頂，就係保安局至今仍然採取觀望態度，拒絕將曼谷外遊警示級別提升至黑色，搞到旅行社唔知點算好。正如業界人士話齋，保安局應該預計可能發生嘅事情，提升曼谷旅遊級別至黑色，若然要等到有血腥事故發生先至提升級別就太遲嘞。保安局答覆本報查詢之時只係重申，如非必要香港人應該避免前往曼谷。
保安局嘅觀望態度，不期然令人想起幾年前嘅一段往事，當時泰國又係有人示威，機場徹底癱瘓，唔少香港人滯留當地，保安局居然遲遲都唔肯派出包機去救人。其中有一名香港人最可憐，由於心急如焚想搭飛機，結果頻頻撲撲撞車身亡。
計功夫茶話齋，唔該保安局決斷少少啦，反正官老爺都叫人如非必要唔好去曼谷咯，點解唔索性發出黑色外遊警示呢？一有咗黑色外遊警示，旅遊業界就唔會無所適從，個個都知道應該點樣因應啦嘛。
港產官僚嘅通病永遠係後知後覺，猶豫不決，好心今次醒少少，唔好再遲疑嘞，警示黑不容緩，救人刻不容緩吖！