政情：公民講場：雙貪挫廉潔 港「揚威」國際

「貪曾」前特首曾蔭權爵士同「貪湯」前廉政專員湯顯明又再「揚威」海外！美國傳統基金會尋日公布「全球經濟自由度指數」，雖然香港連續第二十年蟬聯全球最自由經濟體，但唯獨反映貪污情況嘅廉潔程度指數，竟較去年急跌一點七分至八十二點三分，全球排名更按年下跌至第十三位，喺頭六名嘅自由經濟體系中「包尾」。數數手指，過去一年最轟動香港嘅貪腐醜聞，肯定要數「貪曾」前年接受富豪款待仍遲遲未落鑊、「貪湯」去年被揭發酬酢醜聞。香港甫踏入二○一四年即「揚威國際」，真係要多得呢兩位貪官種下嘅禍根！