政情：高官同學會 射住馮煒光
出任新聞統籌專員（IC）唔夠一個月嘅馮煒光都算係惹火人物，但咪以為佢加入政府並非舉目無親，原來都仲有三個大學同學射住，包括現任政府新聞處處長黃偉綸（Michael），同下月接任黃偉綸嘅政務司司長辦公室專員聶德權（Patrick），佢哋係馮煒光讀大學時嘅師弟，就連律政司司長袁國強（Rimsky）亦早喺大學時代已經與馮認識。
畢業後與黃偉綸外遊
馮煒光早前未正式上任，就已經喺就申請IC一職回應傳媒時爆出一句「我只能夠答三個字︰不予置評。」因而熱爆全城。佢多年前喺報章撰寫、講述積極約會心儀異性，但被請食檸檬嘅「失戀」故事亦畀人摷出嚟，而佢喺台北影嘅攬女照亦喺網上曝光。對於呢個咁具話題嘅人物，有傳政府中人都耍手擰頭，極力反對佢加入熱廚房。
不過，喺香港大學畢業嘅馮煒光，有Michael、Patrick、Rimsky三位師弟照應，佢哋喺讀大學時已有交手。話說Michael曾喺大學搞辯論隊，本身係辯論隊出身嘅馮煒光當年都有幫手。例如Michael嘅辯論隊搞宿營集訓，馮煒光都有份幫手訂場地，佢哋畢業後仲有一齊去旅行。
至於Patrick讀大學時就係學生會屬會、俗稱「三蛇」嘅社會科學學會一員，同熱心學生會事務嘅馮煒光自然認識。至於Rimsky，讀法律又冇咩點搞學運，應該同馮煒光冇咩關係。不過，原來Rimsky當年要代表佢所屬嘅聖約翰宿生會去學生會評議會開會，所以亦都同馮煒光有所接觸，亦算係相識一場。
聶德權樂扶助「弱勢」
雖然馮煒光喺爭議聲之中上任面對唔少壓力，但佢喺政府有呢三個舊同學，睇在一場相識份上，佢要吐吓苦水應該都唔會搵唔到對象，況且聶德權有三隻「耳」，又做過社會福利署，相信都會願意扶助「弱勢社群」嘅。