中環出更：仁愛堂靚太籌款熱舞
仁愛堂日前喺洲際酒店舉行周年慈善餐舞會，為咗襯托「情迷西班牙」派對主題，主席陳鄭玉而、副主席史顏景蓮（Kimmy）及羅台秦（Louisa）等靚太齊着上火辣舞衣獻舞。其中Kimmy搵本地設計師趕製嘅舞衣靚絕全場，熱舞之間彷彿化身西班牙熱情女郎，加上多位舞林高手表演鬥牛舞及探戈，成晚氣氛勁高漲，話咁快就籌得近一百八十萬元善款。
Kimmy話，件舞衣由設計到起貨只用咗一星期，再次發揮快靚正嘅香港精神。點解咁趕？原來佢初期冇諗過特登訂做晚裝，但由於佢係晚宴籌委會主委之一，諗諗吓，都係應該着得襯番晚宴主題，於是急急腳搵相熟嘅本地設計師一齊度橋設計，最終戰衣順利趕製完成。Kimmy再set個靚髮型，配襯埋頭飾，估唔到效果咁好，當晚好友盛讚不已。
化身「西班牙女郎」獻技
Louisa同丈夫中華廠商聯合會常董戴澤良當晚都買咗兩張枱，請埋中港台好友齊去打氣，包括Louisa嘅台灣鄉親台北經濟文化辦事處處長嚴重光、港澳台灣慈善基金會創會主席林添茂。慈善機構齊惜福總幹事楊民儉（Robert）夫婦亦喺度，Robert話，齊惜福將喺油塘成立第二個社區廚房，希望每日可以為有需要人士提供二千個飯盒。
現場仲有一對俊男美女，就係深圳集德創建集團潘海飛及太太韓菲，仲有佢哋嘅生意拍檔海石集團董事朱清石，Louisa盛讚佢哋係內地年輕人白手興家嘅典範，是夜特登請佢哋落嚟體驗港人做善事嘅歡樂。
卓妮