阻街係一種犯法行為，封路又點睇呢？臨時性嘅封路措施周不時都有，目的不外乎係配合建築維修工程，之但係大家有冇諗過原來封路都可以為咗賺錢？如果冇諗過，功夫茶今日就要帶大家去開一開眼界嘞。
話說藍田有一個啟田商場，係領匯旗下其中一個收租致富嘅好地方，啟田商場有一條戶外通道，連接行人天橋前往港鐵站，繁忙時段絕對可以有效疏導人流。點不知奇怪嘅事情發生咗，領匯居然長時間將呢一條戶外通道上鎖，唔准路人甲乙丙出出入入。封路嘅原因係乜呢？咁就要睇睇啟田商場嘅結構嘞。
啟田商場既係購物消費區，亦係德田邨同平田邨居民前往藍田站嘅主要通道，人流所經之處好多時候有展銷攤位。好嘞，戶外通道長期封路，居民去藍田站搭車，或者從藍田站回家，可以點樣做呀？唯一嘅選擇就係通過啟田商場，順道逛一逛展銷攤位，或者有人一個唔覺意購物欲受到挑逗而不能自拔，放低銀両換取心頭好。
大家嘗試從領匯嘅奸狡角度諗一諗，唔畀呢條路你行，只畀嗰條路你過，啟田商場嘅人流係咪會激增呀？人流激增係咪會帶來商機呀？帶來商機係咪可以賺到盡呀？你知啦，領匯作為香港地產霸權嘅中堅分子，一見到租戶生意火熱就會好似賊佬一樣撳住搶，透過瘋狂加租去掠奪租戶嘅收入。
講到呢度大家應該恍然大悟，領匯嘅封路完全係出於霸道嘅需要，霸道嘅目的就係一如既往賺到盡，徹頭徹尾係一副錙銖必較嘅奸商本色。唔好怪功夫茶多嘴，萬一啟田商場發生乜嘢緊急事故，少咗一條戶外通道隨時害死好多人呀！
領匯監察發言人陳寶瑩指出，如果公契寫明嗰度係公眾使用通道，領匯封路就有可能違反公契。若然功夫茶係愛民如子嘅官老爺，一定會主動查一查領匯究竟有冇犯法。喂，開講都有話啦，畀條生路人哋行吓吖嘛，你出於逼人逛商場嘅商業計算而封路，好鬼死橫蠻啫。
其實講真吖，香港嘅商場愈來愈千篇一律，來來去去都係熟口熟面嘅貨色，就算封路逼人逛商場，都未必能夠挑起購物欲啦。關於呢個問題，又牽涉到地產霸權，因為租金實在太貴，所以只有大型連鎖商先至租得起，空有特色苦無實力嘅小本經營者惟有黯然離場，結果導致商場了無新意。
點都好啦，唔該領匯戒一戒發錢寒嘅壞習慣，畀條路大家行吓得唔得？返工返學放工放學趕時間吖嘛，邊鬼個得閒同你人逼人購物呀！