高官經常都坐「音樂椅」調任，尋日政府公布高官調動，其中勞工處處長卓永興同食物環境衞生署署長梁卓文就抽到條好籤，分別調任二○一四年政務主任招聘委員會主席及香港駐美國總經濟貿易專員。眾所周知，勞工處同食環署都係「三煞位」，唔係咁容易做得好，尤其係勞工處經常要處理勞資糾紛，但卓永興連工會活動都唔多去，又成日快閃當記者透明，今次被調去負責招聘政務官，真係益咗佢。至於食環署要處理街市小販議題，執法又被人批評，唔執法又被人批評，今次梁卓文調去美國，真係「山高皇帝遠」。
