政情：今日你上鏡：卿姐嫻姐一日喜「雙」逢

距離農曆新年仲有半個月，但立法會議員劉慧卿同陳婉嫻尋日就一齊着住紅色系嘅衫，唔知仲以為係新春團拜，而且仲一日內兩度碰頭添。話說佢哋朝早一齊上電台節目，就明日政府發表施政報告發表意見，下晝嫻姐又就出席卿姐嘅網台節目，連卿姐都忍唔住話，大家一日內見兩次，真係好有緣喎。不過，有緣還有緣，卿姐喺節目度介紹嫻姐時就講錯嫻姐係工聯會榮譽主席，搞到嫻姐急急澄清，話係榮譽會長至啱，睇嚟卿姐要背熟嘉賓啲銜頭至得喇。