以大狀為首嘅公民黨（公文袋），曾經喺港珠澳大橋、外傭居港權兩宗司法覆核案件期間，支持度插水式下跌，令公文袋喺選舉連番失利，連累陳淑莊都選唔到。最近有團體進行民調，發現公文袋再次成為市民唾棄對象，除咗九龍東梁家傑外，其餘四位議員即港島區陳家洛、九龍西毛孟靜、新界西郭家麒及新界東湯家驊嘅評分都直線下跌。
香港研究協會月初訪問一千二百位市民，對三十五位地區直選議員及五位超級議員進行評分，一分最低、六分最高。結果發現大部分錄得評分下跌嘅都係泛民主派議員，當中以公文袋四位議員跌幅最大，陳家洛評分急跌零點四分，係公文袋成績最差一位。而毛孟靜（阿毛）、郭家麒同湯家驊評分都跌唔少。
近期公文袋已愈來愈低調，無論係政改問題定係新移民申領綜援一事上，寧願做鴕鳥都唔出聲，唯獨阿毛就參與「香港本土」倡議「源頭減人」，建議港府收回內地單程證嘅審批權，結果備受批評，如果因為咁而令黨內議員評分下跌，睇嚟該黨真係要檢討吓喇。至於市民對五位超級議員評分，白鴿黨涂謹申同何俊仁嘅評分亦雙雙下跌。