政情：民政局三千萬 搞分化
距離財政預算案公布仲有個多月，但民政事務局去年十一月率先同九大藝團報喜，話嚟緊新一個財政年度開始，每年會增撥超過三千萬嘅年度額外恒常資助。聽落好似係喜訊，但有藝團就批評，原來筆錢要好似「一般項目性資助」咁競投，申請手續繁複唔在講，又冇明確嘅批核準則，製造更多問題同混亂，質疑局長曾德成係咪想用三千萬元分化九大藝團，有藝團商量之後更決定帶頭放棄申請。
文化開支大倒退
九大藝團之一嘅「進念‧二十面體」董事會尋日召開記者會，董事會主席靳埭強（靳叔）慨嘆，九大藝團話就話係香港優秀演藝人士嘅集合體，但係長期資源同場地匱乏係九大藝團遲遲未能全面性發展嘅原因。早前佢哋已向政府反映過九大藝團恒常所需資源，例如藝團人工偏低、無專屬辦公室同排練場地等，但係民政事務局冇諮詢九大藝團，就拋出三千萬元資助方案，好明顯當局唔了解文化藝術發展，純粹係派錢耍公關手段、見招拆招了事。
靳叔又大鬧政府咁多年都唔重視文化藝術發展，話香港九七年回歸，文化藝術開支佔經營開支都仲有百分之一，但係去到上一個財政年度，已經跌到得番百分之零點九。
靳叔話，上個財政年度藝術文化開支有三十三億元，帳面上睇落去好似好多，但係實際有接近八成開支都落咗康樂及文化事務署個袋，好似圖書館、博物館等行政經費咁，真正資助中小型藝團只得四千萬元，仲要有超過一百個藝團競爭。
靳叔話寧願唔要
靳叔仲話，「進念‧二十面體」開會商量過之後，決定放棄申請呢三千萬元資助，寧願政府將增撥畀九大藝團嘅三千萬元，改為支持中小型藝團，平均資助額可以激增七成半。長遠當然希望政府喺新一份施政報告或財政預算案宣布好消息，把文化藝術發展開支倍增至六十億元，咁先可以打造藝術國際大都會。