中環出更：王庭聰嫁女 政商文化界齊賀
近月政商界名人喜事浪接浪，前日輪到港區全國人大代表王庭聰大女王麗霞（Crystal）出閣，同金融才俊邢高福（Jimmy）喺尖沙咀洲際酒店擺婚宴，好多政商界及文化界名人到賀，包括國學大師饒宗頤、特首梁振英、觀瀾湖主席朱鼎健、中港照相器材集團主席孫大倫等，場面相當熱鬧。
講到嫁女，王庭聰就話冇咩特別壓力，最緊要女婿識得尊重人，至於想幾時抱孫，就更加唔急得。至於Crystal自己就緊張得多，仲去咗三個地方影婚紗相，由於到賀賓客非常之多，Crystal同老公Jimmy忙到成晚滿場飛，影相影到變布景板咁滯，但依然笑容滿面幸福滿瀉。
饒宗頤祝「佳偶天生」
原來好多名人都同王庭聰好有淵源，好似東區區議員李進秋咁，當日就帶埋一對金鐲送畀Crystal，原來佢係王庭聰契妹，亦即係新娘嘅契姑姐，唔怪得不忘帶埋厚禮喇。至於饒宗頤亦送咗一副墨寶同字畫畀一對新人，祝佢地「佳偶天生」。
其他賓客亦悉心打扮，好似行政會議成員葉劉淑儀咁，當日就以中性打扮現身，皆因佢知道新娘本身係做婚禮行業，所以就想特別啲玩反寸。立法會議員黃國健亦有到場，問到佢同王庭聰係咩關係時，佢就話自己嘅助理啱啱被王庭聰撬走咗，不過佢話係講笑啫，希望佢個女嫁得好先係真嘅。
卓妮