成日都話香港地少人多起樓難，搞到蝸居一族叫苦連天，實情係點嘅呢？冇錯，香港只有區區一千平方公里面積，比起其他國家同地區簡直係「地圖上嘅一粒鼻屎」，之不過咁喎，如果一千平方公里運用得宜，仍然可以大興土木起到好多樓。問題嘅癥結就在於，有冇浪費土地？有冇地盡其利？
現屆政府為咗覓地起樓，改善長期困擾本地同胞嘅房屋政策，最近十分積極大規模改變土地用途。規劃署建議大埔區內八幅綠化及社區用地改劃為住宅發展，合共涉及二十六公頃土地，當中一幅原本撥作私家醫院嘅土地，將提供五千四百個公營住宅單位，其餘七塊地皮提供四千幾個私營住宅單位。
除此之外，規劃署又建議修改《屯門分區計劃大綱圖》，區內十五幅土地一係改變用途，一係增加發展密度，土地面積係十七公頃，十一幅土地可建私人住宅八千個單位，其餘四幅可建二千八百個公營單位。大埔同屯門加加埋埋有二十三幅地皮，一切順利的話總共可為二萬戶提供公營或私營安樂窩。
講到呢度，大家可能會有一個疑問，究竟係現屆政府識變魔術吖，定係前朝政府糟踏資源？就以大埔嗰一幅原本撥作私家醫院嘅土地為例吖，話就話預留作為發展醫療產業之用，實際上係閒置多年養老鼠，當今梁氏朝廷只不過係重新規劃廢物利用咁解咋。亦即係話，前朝曾蔭權政府根本係畫地為牢嘅罪魁禍首！
「東方報業民意調查」結果顯示，三成三受訪者認為前朝政府土地規劃失敗；三成一直斥曾氏政權話冇地起樓係藉口；三成表示應該統計有幾多閒置土地再重新發展。
對於貪曾為咗發展醫療產業而將一幅土地閒置多年，五成四狠批前朝政府浪費資源；兩成五認為貪曾盲目鼓吹醫療產業；一成六覺得醫療產業成空，阻礙建屋進度。
所以話啫，香港仍然有地可用，關鍵係主政人士識唔識用，用不得其所就會累人累物。情況就好比一個大懵師奶，成日呻唔夠錢買餸煮飯，又要預留一筆錢供個仔讀大學，實際上櫃桶底楔埋楔埋不知幾多現鈔，唔識得打開櫃桶望一望之嘛。更加令人氣頂嘅係，話要供佢讀大學嗰個仔，根本係盲字都唔識幾個！
英雄無用武之地，蟻民無蝸居之地，一切都係源於貪曾冇地盡其利，甚至係大規模浪費資源。既然係咁，現屆政府從速撥亂反正啦，唔好任由前朝遺禍繼續害人喇，唔該！