政情：李天穎關注青少年自殺
自殺係時有發生嘅社會現象，新地非執董郭炳湘嘅太太李天穎（Wendy）都好關注呢個問題，除咗出任慈善組織生命熱線嘅執行委員會主席，仲落力為組織籌款。Wendy尋日就出席生命熱線一年一度嘅步行籌款，吸引五百多位善長參與，場面好熱鬧。
生命熱線聚焦學生
聽Wendy講，生命熱線不但設有二十四小時嘅輔助電話，亦有專門探訪長者，或向自殺者親友作出支援嘅外展服務，不過，Wendy俗務纏身少有參與，不過佢都好努力籌款，希望挽救生命嘅行動得以持續。
今個學年出現多宗年輕人輕生嘅報道，實在教人惋惜，因此生命熱線將會聚焦喺在學嘅青少年，會多啲向學校社工或教師講吓，要多加留意出現情緒困擾嘅學生。
農曆新年即將來臨，Wendy話要先同奶奶等長輩共度，然後至諗出外旅行。作為郭家嘅大新抱，Wendy果然係係孝順奶奶嘅榜樣喎。