政情：香港退步 怪獸司長護短
每年財政預算案發表前，財政司司長曾俊華都會循不同渠道大吹淡風，目的係降低各界對政府派錢嘅期望。鬍鬚曾尋日發表例牌每周網誌時，將自己扮成家長，仔女就係香港，目的只有一個，就係企圖將香港嘅競爭力不如人講到唔係乜嘢大事咁。香港競爭力下滑，都係多得如此財金官員囉。
近年部分幼稚園課程愈來愈艱深，連帶高班學童嘅功課都比以前難得多，有傳媒早前就攞咗幼稚園嘅功課畀立法會議員試做，好多望住條題目十幾分鐘都唔識答。唔少怪獸家長唔想仔女「輸在起跑線上」，於是逼佢哋參加play group同數之不盡嘅興趣班，希望佢哋比同年嘅小朋友優勝。不過家長咁做可能會畀自己同仔女好大壓力，影響親子關係。鬍鬚曾尋日就喺網誌上為呢班怪獸家長平反，話父母希望為仔女作最好預備係人之常情，又話父母為子女爭取機會，要求子女加倍努力亦無可厚非。
競爭力下降 話人過慮
佢之後又將人生同馬拉松扯上關係，話馬拉松爭勝關鍵唔在於喺起跑線上爭先，而係可唔可以「由頭帶到尾」，話出色嘅馬拉松選手會按自己同對手嘅體能特質調節步伐，控制節奏，喺合適時間先發力加速，爭取最佳名次。
當鬍鬚曾發表完一大堆似是而非嘅哲學理論後，佢終於開始進入正題，話舊年瑞士洛桑國際管理學院（IMD）發表競爭力排名報告，香港由一二年嘅全球第一跌至第三。社會當時出現大量負面評論，擔心香港競爭力大不如前，鬍鬚曾認為呢班人正正就係怪獸家長，見到仔女考試名次由第一變第三就大發雷霆或憂心忡忡。
其實佢講咁多嘢，都係為香港競爭力排名下滑辯護啫，香港競爭力一向都排得最前，一旦下滑，就係唔掂嘅警號，依家鬍鬚曾咁寛宏大量，話唔緊要嘅，一定有好多香港人都唔會肯過佢囉。作為一個家長，無盡力培育仔女，反而猛講唔緊要嘅，呢啲仲點會係香港精神呢？講到尾，真係唔知邊個係怪獸呢？